Бичгийн хэрэгслийн Стабило интернэшнл компани анх 1855 онд байгуулагдсан бөгөөд дэлхийн 100 гаруй оронд албан ёсны дистрибюторын газартай дэлхийд эхний 3-т орох бичиг хэрэгслийн брэндийг үйлдвэрлэгч юм. Стабило интернэшнл компани нь дэлхий даяар нийт 4300 ажилтантай. Стабилогийн бичиг хэрэгслийн үйлдвэрүүд Герман, Малайз, Чех улсад байрладаг. Герман дахь төв салбар нь Европ дахь түгээлтээ хариуцдаг бол Малайз дахь салбар нь Ази дахь түгээлтээ хариуцдаг байна. Стабилогийн бүтээгдэхүүнүүд чанартай, өнгөлөг загварлаг гэдгээрээ бусад ижил төрлийн брэндүүдээс ялгарч чаддаг ба олон удаа шилдэг загвартай бүтээгдэхүүнээр шалгарч байжээ. Стабило интернэшнл компанийхан үзэг тасалдахгүй байх технологийг анх дэлхийд нэвтрүүлсэн. Стабило брэндийн дэлхий даяар хамгийн зарагддаг “Stabilo Boss” тодруулагч нь 2 секунд тутамд нэг ширхэг зарагддаг гэсэн тооцоо байдаг.
Стабило интернэшнл компанийн Малайз дахь салбараас хүсэлт гаргасны дагуу манай компани Стабило брэндийн албан ёсны дистрибютрыг сонгох ажил дээр 2013 оны 6 сарын 20-ноос 2013 оны 7 сарын 26-ны өдрийг хүртэлх хугацаанд амжилттай хамтран ажиллаа. Энэ хугацаанд манай компани бичгийн хэрэгсэл нийлүүлэгч компаниудтай уулзалтууд зохион байгуулж Стабило брэндийн албан ёсны дистрибютор болоход тохиромжтой гэж үзсэн компаниудын мэдээллийг Стабило интернешнл компанийн Малайз дахь салбар луу явуулсан юм. Мөн Стабилогийн Ази дахь салбарыг хариуцсан төлөөлөгчид Монголд ирж, 7 сарын 25, 26-нд албан ёсны дистрибюторт нэр дэвшиж байгаа компаниудтайгаа хийсэн уулзалтыг бид зохион байгуулж өглөө. Стабило брэндийн албан ёсны дистрибютор нь Монгол улс даяар Стабило брэндийн бүтээгдэхүүнийг албан ёсны эрхтэйгээр худалдаалах эрхтэй болохоос гадна бусад хөнгөлөлт урамшууллыг хүртэх эрхтэй болох юм. Стабило брэндийн зүгээс нэг оронд нэг л албан ёсны дистрибютортой байхыг зөвшөөрдөг. Стабилогийн албан ёсны дистрибюторууд нь тухайн улс орон доторхи түгээлтээ хариуцдаг байна. Стабило интернэшнл компанийн зүгээс албан ёсны дистрибюторууддаа зөвхөн бүтээгдэхүүнээ нийлүүлэх төдийгүй маркетинг дээр туслах, брэндээ хөгжүүлэх тал дээр нь хамтарч ажилладаг байна.
Стабило интернэшнл компанийн талаарх дэлгэрэнгүй мэдээллийг http://www.stabilo.com – с үзээрэй.
