Кабелийн телевиз гэх ойлголтоос өмнө нь 1990 оны үед бид зөвхөн нэгхэн сувагтай, тухайн сувгаар юу л гарч байна түүнийг л үздэг, саахалт айлын хөршөөсөө эсвэл холоос ирсэн хүнээс сонин хачин мэдээлэл дуулдаг, орон нутгийн иргэд хотод байгаа хүнтэй холбогдохын тулд аймгийн төвийг зорин холбоонд дугаарладаг хязгаарлагдмал үед амьдарч байжээ. Харин одоо үед 100 гаруй сувгийг дуу дүрсний өндөр чанартайгаар хүлээн авч, дуртай киногоо хүссэн үедээ төлбөр төлөн үзэж, хэрэгцээт мэдээллээ интернетэд холбогдон авч, алс холын нутагт амьдарч буй ахан дүүстэйгээ дүрсээ харан ярьж, өөрийн амьдралын хэв маяг, үзэл бодлоо чөлөөтэй илэрхийлэх сошиал медиа гэх орчинд үүсгэдэг дижитал эрин үед амьдрах болжээ.
Хурдтайгаар өсөн нэмэгдэж буй дижитал, харилцаа холбооны салбар томоохон компаниуд, бизнес эрхлэгч нарын сонирхлыг маш ихээр татаж байна. Иймд ч олон шинэ компаниуд бий болж өөр өөрсдийн онцлог, хэрэглэгчийг татах бүтээгдэхүүн, шинэлэг үйлчилгээг санал болгож зах зээлд байр сууриа эзэлж байна. Харин бид зах зээлд санал болгож буй бүтээгдэхүүн үйлчилгээ хэрэглэгч нарт хэр таалагдаж байгаа, хэрэглэгчид бидний бүтээгдэхүүн үйлчилгээг ашигласнаар сэтгэл ханамжтай байж чадаж байгаа эсэх, өөрсдийн давуу сул талуудыг мэдэж байх нь чухал байдаг. Ингэснээр хэрэглэгчдээ урт хугацаанд хадгалан үлдэж, хэрэглэгчдийнхээ тоог нэмэгдүүлэн үр ашигтай ажиллах боломжтой юм.
Манай байгууллага нь телевиз, радиогийн олон сувгийг дамжуулах үйлчилгээ эрхлэгч, салбартаа тэргүүлэгч байгууллагатай хамтран кабелийн телевиз ашигладаг айл өрхүүдийн сэтгэл ханамжийг хэмжих, сэтгэл ханамжид нөлөөлж буй хүчин зүйлүүдийг тодорхойлох зорилготой судалгааг амжилттай хийж гүйцэтгэлээ. Уг судалгаагаар Улаанбаатар хот болон Эрдэнэт хотын кабелийн телевиз ашигладаг өрхүүдийг хамруулсан бөгөөд тухайн ашигладаг кабелийн телевиздээ хэр сэтгэл ханамжтай байгааг нийт 12 дэд бүлгийн 89 үзүүлэлтээр тодорхойлсон.
ХЭМЖИЖ ЧАДВАЛ ТА УДИРДАЖ ЧАДНА.
Судалгаа зөвлөх үйлчилгээний тэргүүлэгч MMCG компани
